"وبيلعبها للباك اليمين..اللي بيمشى بالكورة وبيرقص خللى بالك خطر ترقص فى المنطقة دى، بيباصى للجناح اليمين، الولد ده نحط عنينا عليه يا جماعة لعيب حريف جدا، شوف بيعدى إزاى وبيلعبها عرضية أرضية برازيلية...تروح للمهاجم اللي بينيم المدافع وهو والجون، هو والجون ..."
لحظة واحدة، قبل ما نعرف الكورة دخلت جون ولا لأ.. عاوز أقول حاجة، عمرك وقفت فوق برج عالى أو فى بالكونة فى برج و بصيت على الناس اللي فى الشارع...أكيد ساعتها شوفت الناس ماشية فى حجم النمل أو أصغر شوية، ده رايح شغله، ده بيجرى متأخر على ميعاد خطيبته، واللي ماشى سارح فى ملكوت ربنا وهموم الدنيا كلها فوق دماغه، أوعى تقول مالكش دعوة أصلى معرفهمش، لأ لأن كل واحد منهم ليه دور فى الفيلم اللي إنت بطله، فى منهم الكومبارس ومنهم السنيد ومنهم البطولة التانية فى فيلمك الطويل اللي إسمه حياتك، لو أى واحد منهم قصر فى دوره ممكن ده يكون سبب فشل الفيلم وما يحققش أرباح.
أو لو إعتبرنا حياتك ماتش كورة هتلاقى فيها المدرب اللي هما أهلك و فيها المدافعين و خط الوسط اللي هما الأشخاص الموجودين فى حياتك و فيها الهداف اللي هو إنت، تخيل بقى لو إنت هداف جامد قوى بس اللي حواليك مش مساعدينك تجيب إجوان، أكيد هتخسر الماتش.
حياتنا كلها متشابكة ومتداخلة مع بعض، يعنى أنا ليا دور فى حياتك وإنت ليك دور فى حياتى، لو أنا قصرت فى دورى حياتك هتتأثر ولو إنت قصرت فى دورك حياتى أنا هتتأثر، و هو دا مفهوم فريق العمل اللي ربنا خلقه فى الدنيا دى وإدى بقى أمثلة على الكلام ده زى ما إنت عاوز من طوابير العيش للمرور للتعليم لسوق العمل حتى لنسبة العنوسة ومعدلات الطلاق العالية... فأول حل لمشاكلنا هو أن كل واحد فينا يكون جزء من فريق العمل الكبير قوى اللي إسمه المجتمع المصرى.
بس هو يعنى إيه فريق عمل؟ مش دول اللي هما الناس اللي شغالين مع بعض فى نفس الشركة؟!!...ولا يمكن دول الناس الشغالة مع بعض فى نفس المجال؟!!...لأ يا سيدى فريق العمل دا موجود فى المدرسة وفى الجامعة..فى البيت والشغل فى كل حتة إنت بتروحها وبيبقى فيها ناس عندهم هدف مشترك معاك.
وفريق العمل زى ما بيعرفوه خبراء علم التنمية البشرية هو أى مجموعة من الناس بيجمعهم هدف واحد أساسى حتى لو كانت الدوافع مختلفة، نقول مثلا الفريق اللي إحنا جيبنا حتة من الماتش بتاعه في أول كلامنا، الهدف الأساسى بتاع الفريق ده إنه يكسب الماتش، المدرب واللعيبة والإدارة والجماهير، كلهم هدفهم الفوز بالماتش.
صحيح الدوافع مختلفة زى مثلا رئيس النادى، عاوز يكسب عشان ما يخسرش إنتخبات النادى الجاية، والمدرب عاوز يكسب عشان الإدارة ما تمشيهوش، واللعيبة عاوزة تكسب عشان تاخد فلوس أكتر وتتشهر أكتر، والجماهير اللي قاعدة فوق دى شوية عاوزين يكسبوا عشان يغيظوا أصحابهم اللي بيشجعوا الفرقة التانية، و شوية تانين عاوزين الفريق يكسب عشان يطلعوا يهيصوا فى الشارع شوية.. بس فى الآخر كل الناس دى هدفهم واحد إن الفريق يكسب، فالإدارة تخطط والمدرب يتكتك ويدرس الفريق المنافس واللعيبه تتمرن وتركز والجماهير تشجع وتحمس اللعيبة. فلو كل واحد من الناس دى أدى دوره صح، أكيد الفريق هيكسب.
بس مش كل فرق العمل الأدوار بتبقى متقسمة بوضوح زى فرق الكورة. لو جينا أنا وإنت وإتنين كمان من صحابنا نعمل مشروع، فى الأول هنتعرف كلنا على بعض وكل واحد فينا هيعرف الباقى على نفسه، ودى أول مرحلة هى التعارف بين أفراد فريق العمل، تانى مرحلة هى مرحلة الاختلاف فى الرأى يعنى من الآخر الخناق، هنقعد نتكلم فى المشروع و إزاى ننفذه فأنا هقول رأيى وإنت هتقول رأيك وكل واحد هيقول رأيه وبعد كده كل واحد هيصمم على رأيه فممكن نشد مع بعض شوية فى الكلام، نتعصب وهنا بقى يظهر قائد فريق العمل، و هو الشخص اللي يعرف يقرب وجهات النظر ويحول الخلافات و الخناق لمناقشة موضوعية يبقى كل الكلام فيها عن مصلحة المشروع.
وعلى فكرة المرحلة التالتة دى من أهم المراحل لأنها لو الفريق ما مرش بيها قدرته على التفاهم هتقل لأن أكتر وقت تقدر تعرف فيه الإنسان اللي قدامك بيبقى وهو متعصب لأنه ساعتها بيتكلم بصراحة وبعد لما المناقشات تهدى تلاقى فريق العمل تلقائيا بقى واخد على بعضه أكتر ومتفاهم أكتر، ومن هنا نوصل للمرحلة التالتة وهى مرحلة التناغم بين أعضاء فريق العمل وساعتها يكون بان دور كل فرد فى الفريق وقائد الفريق يكون وصل لمرحلة كويسة من التفاهم بين أعضاء الفريق.
"والآن حان وقت الاعتذار عن إنقطاع البث، وزى ما حضرتكم عارفين الماتش دا منقول عبر الأقمار الصناعية، المهاجم إحتراما لمشاعر السادة المتفرجين في المنازل ما رضيش يشوط الكورة والبث منقطع .... وفضل واقف هو والجون... هو والجون ... هو والجون ... وبيشوووووووووووط........ وجوووووووووووووووووووووووووووووون، ياسلااااااااااااااااااام ... مش باقولكم لعيب حريف جداً"

ههههههههههههههههههههههههههههههههه

يا نهار ابيض يا نهار ابيض ايه الحلاوة دى ايه الليلة دى

الواد حريف حريف مش اى كلام

بس ايه يا متر الكلام الجامد

بس بجد بجد بجد كلام جميل جدا

ميرسي ليكى يا سمسم